مستنيين الفـــــــــرج
قاعدين عليك يا طريق مستنيين الفـــــــــرج
بنفصل المواوويل على اللي حاله اتعــــــوج
بنموت على اللي بعد بنموت على اللي خرج
يارب ليه الحقيقة يمنعها فينا الحــــــــــــرج
.......... وعجبي
الفقر ماله دوا والحظ ليه معكــــوس
والدنيا متشقلبة والحال كده منكوس
ما تموتونا بقا ولا تهاجرونــــــــــــا
يا تعيشونا غنم وتزودنا فلــــــــوس
.......... وعجبي
الحلم ماله كده تعبان ومش قــــــــــــــادر
وبيوته متعتمه والطعم فيه فاتــــــــــــــر
عمال ينوح بالبكا وعيونه ليه خايفـــــة
فرضوا عليه خصخصة يارب يا ساتر
.......... وعجبي
الحب بيته القمر حريته أســــــــــوار
والعشق فيه جمرته أكلك منين يا نار
يا حب ليه جنتك نادرة ما بتدومــش
حتة كمان خمرتك آخرها طعم مــرار
.......... وعجبي
يا شعر ليه كلمتك ما بقتش زي السيـــف
ولا عدت ترسم أمل ولا عدت تلمح طيف
كل كلامك صار بالغش والتأليـــــــــــــف
وصبحت تكتب أوامر يا حاكمين الزيــف
.......... وعجبي
القلب باع الضنا وبيحضن القســــــاوات
وصبح بليد الخوف على حبه اللي مــات
سكة حياته شقا كل الكلام ميـــــــــــــــت
يا قلب ليع غنوتك صبحت رماد ورفــات
.......... وعجبي
الصقر يطلع لفوق يسبق ضلوع الريــح
لا يهمه سلطة بشر لا أذن أو تصريـــح
يا هل ترى يا صقر فرحان بحريتـــــــك
ولا انت برضه كده قلبك ماليه تجاريح
.......... وعجبي
الليل ملت دروبه م السكات اللي سكــــــــــــــــــــن
دارت تنوح ع الكلام اللي اندفـــــــــــــــــــــ ــــــــن
ولمحت من بين السواد لون البياض ــ قولت الأمل
روحت ألمسه طلع الأمل توب الكفـــــــــــــــــــــ ن
.......... وعجبي
يارب يا أبو الرضا افتح لنا بابــــــــك
وابعدنا من العدا قربنا لاحبابــــــــــك
تعبت كتافي من الذنوب اللي اتمـــلت
ع الرغم انك قريب م العبد لو سابــك
.......... وعجبي
شفتك هناك يا وطن قولت أنا جيـــلك
معرفتش اني ضعيف لسه بناديـــــلك
فجأة اللتقيتك نيل يروي ضلوع قلبي
فجأة التقيتك قمر قايدة قناديـــــــــلك
.......... وعجبي
يا قلوب عليها الصدا يا عقول ماليها البور
ولا عمره كان النوربالعافية أو بالــــــــدور
ولا عمره كان الرضا حبة خطوط مايلـــــة
ولا عمره كان الرضا بالحلم والمنظـــــــور
.......... وعجبي
يا رايحين للنبي يا واقفين ع البـــــــــــاب
طلبي بسيط والنبي طلبي مالوهش ثـواب
قولوا للحبيب النبي مسألتي عايزة جواب
مين ييجي بعدك نبي والكل صاروا تــراب
.......... وعجبي
يا ميتين بالعدد يا ميتين بالـــــــــــــدور
توب الإهانة اتفرد سيف الحيا مكســور
لو كان ما بينكم ولد شايف طريق النور
ليخطي صوته الأبد ويهد باب الســــور
.......... وعجبي
أيوب ما كنش صبور أيوب ده كان مرغـم
لو خيروا ايوب بين الأنتظار والمــــــــوت
لاختار يموت أرحم لاحسن يموت مكبــوت
.......... وعجبي
ماشي على السير اللي سف من العـــــدم
شايف أماني بتنطفي وبتنهـــــــــــــــــدم
وقفت سيري وانفلت مني الجــــــــــواب
يا هل ترى أخر الحكاية دي ندم ولا ألم
.......... وعجبي
يا معلمين القلم يكتب كلام تهجيس
بالدور كده يتهم ويفبرك القصاقيص
وبدمكم يترسم لون الحيطان في النفي
يا الصلب والمشنقة والموت بلا ترخيص
…………..وعجبي
وصل التراب الحلق من عفرتك يا طريق
يامجربين الشنق من فيكو لسه بريء
والموت ده ليكو شاف يا عاشقين الوطن
ياتدوروا ع الأرصفة والسجن ليكو صديق
……………….وعجبي
وطلعت فوق السما باصص على الملكوت
شوفت الخلايق عدم تستنى أو بتفوت
ولمحت فوق العدم حبة كلام مكتوب
الأولى كلمة نعم وآخره كلمة موت
…………….. وعجبي
يا عاشقين الوطن جوة السجون أسوار
هيموتوا لويعرفوا مابينكوا من أسرار
وتلاقي لوحة عدم منقوشة فوق الراس
من فيكو يعشق وطن لازم يخش النار
……………… وعجبي
الإثنين أبريل 20, 2015 8:41 am من طرف نيكيتا
المزاج